 |
| ពេជ្រ សោភា នឹង ឆឹម សក្កដា (រូបភាពពីហ្វេសប៊ុក) |
នៅទីបំផុត តារាចម្រៀង ពេជ្រ សោភា បានសារភាពថា តារាសម្ដែងលោក ឆឹម សក្កដា ពិតជាមានទំនាក់ទំនងមិនធម្មតាជាមួយខ្លួន។ នាងបានប្រកាសបែបនេះ បន្ទាប់ពីលោក ឆឹម សក្កដា ត្រូវគេឃើញតាមស្អិតជាមួយនាងក្រៅឆាក និងលោកបានប្រកាសថា ស្រឡាញ់ ពេជ្រ សោភា ស្មើជីវិតជាសាធារណៈនៅលើបណ្តាណទំនាក់ទំនងសង្គមហ្វេសប៊ុក។
ពេជ្រ សោភា និយាយថា រវាងនាង និងលោក ឆឹម សក្កដា ស្គាល់គ្នាយូរមកហើយតាមរយៈឱកាសបានថតបទចម្រៀងជាមួយគ្នា។ ប៉ុន្តែចំណងស្នេហ៍ដែលបានកើតឡើងទើបតែមាននាពេលថ្មីប៉ុណ្ណោះ ដោយនាងថាលោក ឆឹម សក្កដា ជ្រៀតខ្លួនចូលក្នុងជីវិតរបស់នាងម្ដងបន្តិចៗ ដែលធ្វើឲ្យនាងទទួលយកក្ដីស្រឡាញ់ដោយមិនដឹងខ្លួន។
ក្នុងពេលថតបទចម្រៀងជាមួយលោក ឆឹម សក្កដា នាងថា លោកតែងធ្វើរឿងប្លែកឲ្យនាងសប្បាយចិត្ត ហើយនាងមិននឹកស្មានអ្វីដែលលោកបានធ្វើគឺជាក្ដីស្រឡាញ់នោះទេ ដោយនាងគ្រាន់តែនឹកស្មានថាធ្វើក្នុងនាមជាអ្នកគាំទ្រមិនខុសគ្នាពីហ្វេនរបស់នាងទូទៅប៉ុណ្ណោះ។ នាងថាទង្វើរបស់លោកកាន់តែចាក់ជ្រៅក្នុងជីវិតរបស់ខ្លួនក្នុងពេលដែលលោកចេះតែចំណាយពេលច្រើនឡើងធ្វើឲ្យនាងសប្បាយ និងធ្វើអោយនាងស្គាល់ថាឈប់ឯកោក្រោយជីវិតអាប់អួរ។ ជាពិសេសក្នុងពេលដែលលោករមែងញញាក់អារម្មណ៍ដល់នាងនូវកាដូផ្សេងៗ ទើបនាងសម្រេចចិត្តទិញនាឡិកាគូស្នេហ៍មួយគ្រឿងអោយលោកក្នុងថ្ងៃ២៤ ធ្នូ មុនមួយថ្ងៃពិធីបុណ្យណូអែល។
យ៉ាងណាមិញ នាងថា អ្វីដែលខ្លួននៅតែស្ទាក់ស្ទើរថាអ្វីដែលនាងផ្ដល់ឱកាសឲ្យតារារូបនេះចូលខ្លួនកៀកកិតខ្លួន គឺជាស្នេហានោះទេ ដោយសារតែថាខ្លួនហាក់មានអារម្មណ៍មិនទុកចិត្តចំពោះលោក១០០ភាគរយនៅឡើយ។ នាងថា ស្ទើរមិនចង់ជឿត្រចៀក ដែលខ្លួនជាស្រ្តីមេម៉ាយហើយធ្លាប់ខកចិត្តបែរជាមានកំលោះម្នាក់ស្រឡាញ់នាងស្មោះស្ម័គ្រ។
នាងថា លោក ឆឹម សក្កដា មិនមែនជាអ្នកសិល្បៈដំបូងនោះទេ ដែលតាមស្រឡាញ់ ប៉ុន្តែនាងបានក្លាយអ្នកសិល្បៈទី១ ដែលជួយព្យាបាលផ្លូវចិត្តរបស់នាងឲ្យស្រស់ស្រាយខុសពីមុន។ នាងបានសម្រេចទទួលយកអំពើល្អរបស់លោក បន្ទាប់ពីលោកបានបង្ហាញនូវទង្វើច្រើនយ៉ាងដែលនាងធ្វើឲ្យនាងពិបាកប្រកែក។
នាងថា លោកគឺជាបុរសពោពេញដោយភាពផ្អែមល្ហែម ទើបនាងចេះតែខ្លាចរអារទំនាក់ទំនងដែលបានសាងឡើង មានការប្រែប្រួល។ នាងសារភាពថាលោក ឆឹម សក្កដា ក្លាយខ្លួនជាចំណែកមួយសំខាន់ក្នុងជីវិតរបស់ខ្លួន ប៉ុន្តែនាងមិនទាន់ហ៊ានថាទំនាក់ទំនងមួយនេះមានភាពរឹងមាំដូចគ្នានឹងគូស្នេហ៍របស់អ្នកនាង ខាត់ សុឃីម និងអ្នកនាង គង់ សុជាតិ ដែលជាស្នេហ៍របស់តារាសិល្បៈនោះទេ។
ពេជ្រ សោភា បានសារភាព តារាសម្ដែងលោក ឆឹម សក្កដា ជ្រាតចូលក្នុងជីវិតរបស់ខ្លួន ក្នុងពេលដែលនាងឯកោ ហើយពោរពេញដោយភាពទុក្ខសោកព្រោះតែការបាត់បង់ឪពុក និងក្រោយក្លាយខ្លួនជាស្រ្តីមេម៉ាយ។ នាងសរសើរថាលោកពូកែធ្វើសំឡេងទិនហ្វីឲ្យនាងសើចសប្បាយ និងភាគតិចណាស់មិនធ្វើអោយនាងភ្ញាក់ផ្អើលនូវរឿងផ្សេងៗ ជាពិសេសគឺការពញាក់អារម្មណ៍។
នាងនិយាយថា៖ «ខ្ញុំអត់ចង់និយាយថាខ្ញុំស្រឡាញ់គាត់ (ឆឹម សក្កដា) ទេលូវហ្នឹង តែខ្ញុំសារភាពថាខ្ញុំចូលចិត្តគាត់! តាំងពីមានគាត់ជិវិតខ្ញុំលែងឯកោ ហើយខ្ញុំមើលទៅគាត់មានតស៊ូជាមួយខ្ញុំច្រើន ទើបខ្ញុំ […] !»។
អ្នកនាងថា លោកឆឹម សក្កដា បានប្រកាសសុំស្រឡាញ់នាងច្រើនដង ដោយបានសុំខ្លួនមើលថែនាង តែនាងមិនទាន់ហ៊ានឆ្លើយពីជំហរទទួលយក ឬមិនទទួលយកនោះទេ ក្រៅតែពីមិនប្រកែកនូវអំពើល្អរបស់លោក ដើម្បីបន្តមើលទឹកចិត្ត។ នាងថាមានរឿងរំភើបៗជាច្រើនដែលលោកសក្កដាធ្វើអោយនាងយល់ថាជិវិតរបស់ខ្លួនមានន័យមិនដូចមុន អ៊ីចឹងហើយទើបយល់ថាលោកមានចំណុចល្អដែលនាងសម្រេចចិត្តពិចារណា។
នាងនិយាយថា៖ «ខ្ញុំរំភើបជាងគេពេលខ្ញុំទៅច្រៀងនៅស្គន់ គឺគាត់ថាគាត់ជាប់ថតអត់ទំនេរទេ ប៉ុន្តែដាក់ទូរស័ព្ទមិនទាន់ផុតផង គាត់មកដល់! គាត់ចំណាយពេលច្រើនក្នុងជីវិតរបស់ខ្ញុំ ហើយបើទោះជាខ្ញុំទៅច្រៀងដល់ណាក៏ដោយ ក៏គាត់សុខចិត្តទៅពញាក់អារម្មណ៍ដែរ លើកលែងតែគាត់រវល់ទៅអត់បាន!»។
ពេជ្រ សោភា បន្តរៀបរាប់ថា រវាងនាង និងលោក ឆឹម សក្កដា កាន់តែមានសម្ព័ន្ធភាពល្អ ប្រសើរ ប៉ុន្តែចំណងស្នេហ៍ដែលឈានដល់លែងលាក់បាំងនេះ នាងចេះតែខ្លាចនឹងមានវាសនាមិនសមប្រកប បើទោះជាលោកសក្កដា ធ្វើអោយនាងទុកចិត្តក្រោយការសេពគប់។
លោក ឆឹម សក្កដា មិនអាចសុំការបញ្ជាក់បានទេ ប៉ុន្តែបើក្រឡេកទៅមើលគណនីហ្វេសប៊ុកផ្ទាល់ខ្លួនរបស់លោក គឺអ្នកណាក៏ឃើញគ្រប់គ្នាថា លោកប្រកាសយ៉ាងបើកចំហរថារវាងលោក និង ពេជ្រ សោភា ជាគូស្នេហ៍។ លោកបានប្រកាសថា ខ្លួននឹងតស៊ូដើម្បីឲ្យពេជ្រ សោភា ទទួលយក និងជឿថាអ្វីដែលលោកប្រឹងប្រែងជាស្នេហាពិត។ លោកប្រកាសមិនខ្វល់ពីអតីតកាល និងថាអ្វីដែលលោកចង់បានគឺបានប្រើជីវិតមើលថែតារាស្រីរូបនេះសម្រាប់បច្ចុប្បន្ន និងអនាគត។ អ៊ីចឹងហើយចំណងស្នេហ៍មួយនេះ ធ្វើអោយមានមហាជនចាប់អារម្មណ៍ក្រោយបែកធ្លាយ៕
VOD
ដោយ លោក វង្ស សុម៉ាលីន
